Məşhur aktyor Vin Dizel xeyriyyə məqsədilə keçirilən ümumdünya Ice Bucket Challenge (Buz vedrəsi yarışı) onlayn- fleşmobda iştirak edib. Fleşmobun qaydalarına görə, iştirakçılar bir vedrə buzlu suyu üzərlərinə tökür, sonra analoji hərəkəti dostlarına və ya tanışlarına təklif edirlər.

Aktyor, Rusiya prezidenti Vladimir Putin, ABŞ-ın birinci xanımı Mişel Obamanı və aktrisa Anjelina Colini buzlu su sınağından keçməyə cağırıb.

Vin Dizelin çağırış videosu onun Instagram hesabında yerləşdirilib. Onu da qeyd etmək lazımdır ki, Vin Dizel özü üstünə heç soyuq su tökməyib, sadəcə bir vedrə buz parçasını başından aşağı töküb.



Ice Bucket Challenge-də çox sayda məşhurlar - Bill Qeyts, Mark Tsukerberq, Stiven Spilberq, Miki Rurk, Ledi Qaqa, Britni Spirs, Castin Timberleyk və başqaları da iştirak edib. Castin Biber ABŞ prezidenti Barak Obamaya çağırış etsə də qarşı tərəfdən hələ ki heç bir cavab gəlməyib.

Bu filantropik fleşmobun məqsədi mərkəzi sinir sisteminin xəstəliyi olan amiptrofik skleroz (ALS) haqqında maarifləndirmədir.Qeyd etdiyimiz kimi xeyriyyə kampaniyasına dəstək olmaq istəyən insanlar bir vedrə soyuq suyu üstlərinə tökməli, sübut üçün özlərini görüntüləyib videonu sosial şəbəkəyə yerləşdirməlidirlər. Bundan başqa onlar eyni hərəkəti təkrar etsinlər deyə dostlarına, həmkarlarına, tanışlarına bir sözlə istədikləri adama çağırış edə bilərlər. Əgər onlar 24 saat ərzində çağırışa cavab verməsələr kampanityanın təşəbbüskarı olan ALS Association fonduna 100 dollar ödəməli olacaqlar. Əgər çağırışı qəbul etsələr fleşmob onlara bir vedrə soyuq su və 10 dollarla başa gələcək.

Səbinə Həsənova
AzVision.az