TEAS-dan AzVision.az-a verilən məlumata görə, tədbirdə 25 iləvvəl 1992-ci ildə fevral ayının 25-dən 26-na keçən gecə baş vermiş Xocalı soyqırımı qurbanlarının xatirəsi xüsusilə yad edilib. Bu, 106 qadın, 63 uşaq və 70 ahıl da daxil olmaqla 613 mülki şəxsin vəhşicəsinə öldürüldüyü Ermənistan-Azərbaycan, Dağlıq Qarabağ münaqişəsi dövründə ən dəhşətli kütləvi qırğın hadisəsi olub.

Anım konsertində azərbaycanlı skripkaçı Nəzrin Rəşidova, latviyalı klarnet ifaçısı Anna Gagane və Almaniyanın “Rhein-Quartett” adlı kamera ansamblı çıxış edib. Konsert proqramı müxtəlif beynəlxalq təşkilatların, media, vətəndaş cəmiyyəti və diplomatiya ictimaiyyətinin 150-yə yaxın nümayəndəsi qarşısında təqdim olunub.

Anım tədbirini Azərbaycan Respublikasının Cenevrədəki BMT bölməsi və digər beynəlxalq təşkilatlar yanında daimi nümayəndəsi səfir Vaqif Sadıqov açıq elan edərək, silahlı münaqişələrin qarşısının alınmasında BMT-nin rolunu və beynəlxalq sülh və təhlükəsizliyin bərqərar olunmasında təşkilatın əhəmiyyətini vurğulayıb: “İkinci Dünya müharibəsindən sonra BMT-nin yaradıldığı zaman beynəlxalq ictimaiyyət düşünürdü ki, münaqişələrdən azad bir dünya qurmaq mümkündür. Təəssüf ki, bu baş verməyib. Xocalı qırğını Azərbaycanın yaxın tarixinin ən ağrılı səhifəsidir. Biz keçmişin dərslərini öyrənməliyik. Buna görə də biz, bu axşam bütün müharibə və münaqişələrin qurbanlarını anırıq ki, Xocalı qırğını kimi hadisələr bir daha təkrarlanmasın”.

Avropa Azərbaycan Cəmiyyətinin direktoru Lionel Zetter bildirib ki, TEAS-ın direktoru olaraq Dağlıq Qarabağda gedən müharibəni qeyd etməsə, düzgün olmaz: "Düz 25 il əvvəl erməni işğalçılarından xilas olmaq üçün evlərini qoyub qaçan 613 nəfər kişi, qadın və uşaq vəhşicəsinə qətlə yetirilib. Eyni münaqişə olmur. Hər bir yeni müharibənin öz dəhşətli siması var. Lakin onları bir ortaq cəhət birləşdirir: bu, ən çox həmin müharibənin mərkəzində olan günahsız mülki vətəndaşların əzab çəkməsidir".

Konsert “Rhein-Quartett” kamera ansamblının qərb və azərbaycanlı bəstəkarlarının əsərlərinin ifası ilə davam edib. Birinci Dünya müharibəsinin qurbanı olmuş bəstəkar Enrike Qranadosun “Orientale” (ispan üslubunda kompozisiya), Əfrasiyab Bədəlbəylinin “Azad Bir Quşdum” və Xəyyam Mirzəzadənin “Bərzəni” əsərləri ifa olunub.

Anım gecəsi məşhur fransız bəstəkar Pyer Tilloyun həmin faciəli gecənin dəhşətlərindən xəbər verən “Xocalı 613” adlı simfonik poemanın ifası ilə yekunlaşdırılıb. Əsərdə skripka, klarnet və simli alətlər kvartetinin əsgər yürüşü, fəryad, pulemyot atəşi və milli musiqinin elementlərindən geniş istifadə edilir.

Qeyd edək ki, BMT Təhlükəsizlik Şurasının Azərbaycan ərazilərinin hərbi işğalını pisləyən və işğalçı qüvvələrin tamamilə çıxarılmasını tələb edən dörd qətnamə qəbul etməsinə baxmayaraq, Ermənistan bu günə qədər Dağlıq Qarabağ və ona bitişik yeddi rayon da daxil olmaqla Azərbaycan ərazisinin 20 faizini işğal altında saxlamaqda davam edir. Bunun nəticəsi olaraq Ermənistanda və Azərbaycanın işğal olunmuş ərazilərində yerləşən, evlərini tərk etməyə məcbur edilmiş bir milyona yaxın qaçqın və məcburi köçkün Azərbaycanın müxtəlif yerlərində məskunlaşıb və onların yalnız bir arzusu var – sülh şəraitində öz evlərinə və torpaqlarına qayıtmaq.

AzVision.az