“Bakı-Sumqayıt dəmiryol xəttində yenidənqurma işləri ilə əlaqədar Sumqayıt sərnişin stansiyasında məskunlaşan 40-dan çox məcburi köçkün ailəsinə birdəfəlik maddi yardım ayrılacaq”.

AzVision.az -ın məlumatına görə, bu barədə modern.az-a açıqlamasında Qaçqınların və Məcburi Köçkünlərin İşləri üzrə Dövlət Komitəsinin mətbuat xidmətinin rəhbəri Elçin Qədimov deyib.

O qeyd edib ki, Sumqayıt sərnişin stansiyasının inzibati binasında məskunlaşan məcburi köçkünlərin köçürülməsi ilə bağlı Nazirlər Kabinetinin 24 iyul 2015-ci ildə qəbul edilmiş sərəncamı var.

“Stansiyasının təmiri ilə bağlı həmin ərazidə məskunlaşan məcburi köçkünlərin köçürülməsi zərurəti yaranıb. Hər bir məcburi köçkün ailəsinin köçürülməsi üçün onlara birdəfəlik maddi yardım ayrılıb. Bu maddi yardım da “Azərbaycan Dəmir Yolları” Qapalı Səhmdar Cəmiyyətinə ayrılır və onlara da tapşırılır ki, həmin məcburi köçkünlərin köçürülməsi təmin edilsin. Lakin hələlik oradan heç bir məcburi köçkün çıxarılmayıb”.

Sentyabrın 15-ə qədər Bakı-Sumqayıt dəmiryol xəttinin açılacağı qeyd edilir. Əvvəllər Bakı-Biləcəri-Sumqayıt elektrik qatarlarından istifadə edən sərnişinlər təyinat nöqtəsinə 1 saat 22 dəqiqəyə çata bilirdilərsə, yenidənqurmadan sonra bu müddət 40 dəqiqəyə enəcək. Bakı-Zabrat-Sumqayıt qatarı ilə yolçuluq isə 1 saat 29 dəqiqə vaxt aparırdısa, dəyişikliklərdən sonra isə bu müddət 52 dəqiqəyə düşəcək.

AzVision.az