AzVision.az AzərTAc-a istinadla xəbər verir ki, baş katibin bu məsələyə dair münasibətini jurnalistlərə onun rəsmi təmsilçisi Stefan Dyujarrik çatdırıb. “Bu və ya digər dövləti tanımaq BMT-yə üzv ölkələrin özlərinin həll etməli olduqları məsələdir. Qurumun baş katibi təbii ki, İsveçin bu qərarından məlumatlıdır və bu məsələni şərh etmir” – deyə Dyujarrik əlavə edib.

Xatırladaq ki, oktyabrın 30-da İsveçin daxili işlər naziri Marqot Valstrem xüsusi çağırılmış mətbuat konfransında krallığın Fələstin dövlətinin tanınması haqda qərar qəbul etdiyini elan etmişdi. Onun fikrincə bu addım Fələstin-İsrail münaqişəsinin sülh yolu ilə nizamlanmasına şərait yaradacaq. İsrailin Daxili İşlər Nazirliyi isə öz növbəsində bu qərarın “təəssüfə layiq” olduğunu bildirib və məsləhətləşmə üçün Stokholmdan öz səfirini geri çağırıb.

Qeyd edək ki, Fələstin dövləti rəsmi olaraq 134 ölkə tərəfindən tanınıb. Ərəb Ölkələri Liqasına daxil olan Fələstin BMT-də müşahidəçi dövlət hüquqları ilə təmin olunsa da, qurumun bərabərhüquqlu üzvü statusuna malik deyil. O, BMT-dəki statusunu artırmaq üçün Təhlükəsizlik Şurasının razılığını almalıdır. Lakin hazırda Təhlükəsizlik Şurasının hər bir qərarına veto qoymaq hüququna malik olan və İsrailin əsas müttəfiqi sayılan ABŞ-ın tutduğu mövqeyə görə bu, mümkün deyil.