PKK-nın girov götürdüyü azərbaycanlı dəhşətli olaydan danışdı

PKK-nın girov götürdüyü azərbaycanlı dəhşətli olaydan danışdı
  02 Avqust 2015    Oxunub:3889
“Biz şəxsi avtomobilimizlə İqdırdan Naxçıvana getmək istəyərkən silahlı şəxslər qarşımızı kəsdilər, sənədlərimizi və mobil telefonlarımızı tələb etdilər. Sənədləri və telefonları verəndən sonra bizi yol qırağındakı çalaya apardılar”.

AzVision.az-ın məlumatına görə, bu açıqlamanı APA-ya PKK terrorçuları tərəfindən valideynləri ilə birgə girov götürülmüş Azərbaycan vətəndaşlarından biri, 22 yaşlı Əli Səfərli deyib.

Əli Səfərli deyib ki, çalada onlardan başqa insanların olduğunu görüblər: “Bir avtobusun və başqa bir maşının da qabağını kəsərək oradakı şəxsləri çalaya gətirmişdilər. Dedilər ki, bizimlə heç bir problemləri yoxdur. Amma Türkiyədə hüquqları təmin olunanadək avtobusların, avtomobillərin qarşısı kəsiləcək. Kürdüstan ərazisinə heç kimi buraxmayacaqlar”.

Onlar orda olduğu müddətdə PKK-çılar Kağızmandakı körpünü partladıblar.

Əli Səfərli bildirib ki, onları təxminən 4 saat saxladıqdan sonra buraxıblar. Sənədlər və mobil telefonlar geri qaytarılıb. PKK terrorçuları şəxsi avtomobillərə dəyməsələr də, dövlətə məxsus TIR-ları yandırıblar.

Əli Səfərlinin sözlərinə görə, PKK-nın girov götürdüyü Azərbaycan vətəndaşlarının sayı 10-15 nəfər olub.

AzVision.az


Teqlər:  





Xəbər lenti