Bunu AzVision.az-a açıqlamasında millət vəkili Elton Məmmədov qardaşı Nəriman Məmmədovun evində qətl törədilməsi ilə bağlı yayılan xəbərlərə münasibət bildirərkən deyib.

Deputat hesab edir ki, bu kimi xəbərlərin yayılması təsadüf deyil, onların ailəsinə qarşı aparılan kampaniyanın tərkib hissəsidir.

“Həmin insanlara sadəcə demək istəyirəm ki, əsl azərbaycanlı ölkəsinə sadiqliyi üçün müyyən mövqedə olmalı, Azərbaycana sadiqliyini qorumalıdır. Belə iftiralar, yalanlar ümumilikdə dövlətçiliyin müəyyən sütünlarının laxlamasına gətirib çıxara bilər. Qətiyyən belə şeyə yol vermək olmaz”.

E.Məmmədovun fikrincə, jurnalistlər bu kimi yazılar yazan həmkarlarını qınaq atəşinə tutmalıdırlar: “Bu tipli yazılara son qoysunlar, ayıbdır. Əsası olmayan, hüquqi bazaya söykənməyən xəbəri xalqa çatdırıb, ictimailəşdirmək olmaz. Ən azından bunlar etik normalarına ziddir, jurnalist etikasına yaraşmır. Odur ki, həmin jurnalstlərlə bizlər yox, sizlər mübarizə aparmalısınız. Biz onsuz da mübarizə aparırıq” .

Qeyd edək ki, bu gecə Qusar rayonunun Çiləgir kəndində qətl hadisəsi baş verib. Anspress-in bölgə müxbirinin verdiyi məlumata görə, hadisə gecə saatlarında qeydə alınıb. Kənddə yerləşən evlərin birində Bakı sakini, 1945-ci il təvəllüdlü Ramiz Gülməmməd oğlu Vəliyev ov silahından atılan güllə yarasından dünyasını dəyişib. Məlumat daxil olan kimi hadisə yerinə hüquq-mühafizə orqanlarının əməkdaşları cəlb olunub. Araşdırmalar zamanı məlum olub ki, qətli 1967-ci il təvəllüdü Eynulla Cahangir oğlu Hacıyev törədib. Hadisəni törədəndən sonra Eynulla Hacıyev hadisə yerindən qaçıb. Hazırda polis qətli törətməkdə şübhəli bilinən Eynulla Hacıyevin axtarışlarına başlayıb. Faktla bağlı rayon prokurorluğunda cinayət işi başlanıb, araşdırma aparılır.

Yayılan iddialara görə, qətl hadisəsi Ziya Məmmədovun qardaşı Nəriman Məmmədovun evində baş verib.

Xatırladaq ki, deputat Elton Məmmədov və Nəriman Məmmədov nəqliyyat naziri Ziya Məmmədovun qardaşlarıdır.

Gültəkin Ələsgər