AzVision.az xəbər verir ki, bunu millət vəkili Fazil Mustafa bildirib. Deputat hesab edir ki, M.Qurbanov Azərbaycan futboluna xidmətləri olan, milli komanda təcrübəsi olan, təvazökar bir insandır.

“Onsuz da Azərbaycan millisi indiki şərtlərdə qarşısına yüksək nəticələr qoya bilməz. Əslində millidən umacağımız sabit oyun sisteminin qurulmasıdır. Milli çempionat güclü olmadığına, xaricdə güclü çempionatlarda sabit oynayan futbolçuların yoxluğuna, yerli futbolçuların fiziki hazırlığının zəif olmasına görə onsuz da lazımi səviyyədə milli komandanı formalaşdırmaq çox çətindir. Bununla belə, baş məşqçidə, digər məşqçilərdə ən azı Azərbaycan təəssübkeşliyi olmalıdır ki, bunu da futbolçulara aşlaya bilsinlər. Çünki öz ölkəsinin adına oynamaq futbolçuda ayrı bir qürur hissi olmasını tələb edir. Azərbaycanda tamaşaçı auditoriyasında, idman mediasında da anlayışlı münasibət olmadığı ciddi problemlərdən biridir. Baxın, məşqçi yeni təyin olunub, jurnalist sual verir ki, " yəqin ki, millidə qalıb işləməyinizin Norveçlə görüşdəki nəticədən asılı olduğunun fərqindəsiniz?" Demək ki, azərbaycanlı məşqçiyə bir oyundan o tərəfə beyinlərində fürsət tanımırlar. Foqsa 6 il dözüblər, azərbaycanlı məşqçiyə bir oyunluq tale müəyyənləşdirirlər. Uğursuzluq ola bilər, ancaq bütün hallarda yığmanın başında Azərbaycanlı məşqçi olmalıdır və bizlər də dəstək verməliyik ki, addım-addım uğurlu nəticələr və maraqlı oyun sistemi qura bilsin. Bütün hallarda AFFA rəhbərliyinin bu seçimini təqdir edirəm və Mahmud Qurbanova uğurlar arzulayıram”-deyə millət vəkili qeyd edib.

AzVision.az