Buryatiyada Heydər Əliyevə abidə qoyulacaq

Buryatiyada Heydər Əliyevə abidə qoyulacaq
  13 Fevral 2016    Oxunub:1828
Rusiya Federasiya Şurasının Buryatiyadan olan üzvü Arnold Tuloxonov Buryatiyada Azərbaycan xalqının ümummilli lideri, SSRİ dövrünün tanınmış partiya və dövlət xadimi Heydər Əliyevə abidə ucaldılması təşəbbüsü ilə çıxış edib.
TASS agentliyinin verdiyi məlumata görə, A.Tuloxonov fevralın 12-də mətbuat konfransında deyib: “Bunun bir səbəbi odur ki, Heydər Əliyev SSRİ hökumətinin baş nazirinin birinci müavini vəzifəsində çalışarkən Baykal-Amur Magistralı tikintisinə kuratorluq edib. Bu, həm dostluq, həm də minnətdarlıq rəmzi olacaq”.

“Abidə Severobaykalskda qoyulmalıdır və xalqlar dostluğuna, Baykal-Amur magistralının (BAM) tikintisinə həsr edilməlidir”, - deyən A.Tuloxonov xatırladıb ki, bu il BAM-ın Azərbaycandan olan inşaat dəstəsi tərəfindən tikilmiş “Anqoya” stansiyasına ilk qatarın gəlməsindən 35 il keçir.

A.Tuloxonovun sözlərinə görə, hazırda gələcək abidənin postamentinin eskizləri üzərində iş gedir. Layihənin həyata keçirilməsinə Buryatiyadakı Azərbaycan diasporu cəlb edilib. Federasiya Şurasının üzvü daha sonra deyib: “Layihəni büdcədənkənar mənbələr hesabına maliyyələşdirməyə hazır olan təşəbbüs qrupu artıq məlumdur”.

Senator əmindir ki, məhz bu cür layihələr ölkədə vətənpərvərlik və xalqlar dostluğu ideyalarının inkişafına və möhkəmlənməsinə kömək edəcək. A.Tuloxonov deyib: “BAM – bizim adamların sıx birliyinin ən parlaq nümunəsidir. BAM-ı bütün SSRİ tikirdi. İrkutsk vilayətində “Niya” stansiyasını gürcülər, “Anqoya” stansiyasını azərbaycanlılar, “Zolotinka” stansiyasını beloruslar inşa edib və s.”. (Azərtac)


Teqlər:





Xəbər lenti