AzVision.az virtualaz.org-a istinadən xəbər verir ki, yanğın Bakının İstiqlaliyyət küçəsində, Yaşıl Teatrla üzbəüz binada olub. BMT-nin Azərbaycandakı nümayəndəliyinin inzibati binası ilə yanaşı olan binadakı yanğın dünən saat axşam 18:30 radələrində baş verib.

Yanğın 9 mərtəbəli binanın 3-cü mərtəbəsində quraşdırılan elektrik lövhəsində başlayıb. Hadisə yerinə çağırılan Fövqəladə Hallar Nazirliyinin yanğınsöndürmə briqadası yanğının miqyasının böyüməsinə imkan verməyib.

Bununla belə sakinlər ciddi təhlükə ilə üzləşiblər. Belə ki, 3-cü mərtəbədən yuxarıda yaşayan sakinləri təxliyə etmək mümkün olmayıb. Onlar evlərini tərk edə bilməyiblər. Səbəb kabellərin yanması nəticəsində blokun qatı tüstüyə bürünməsi olub. Elektrik lövhəsi binanın çıxışında, pilləkənin yanında quraşdırıldığından sakinlərin yanğın zamanı bu nərdivanlardan istifadə etməsi mümkün olmayıb. Elektrik kəsildiyindən lift də işləməyib. Bina sakinləri məcburiyyətdən evlərindən çölə çıxmayıb. Binanı qatı zəhərli tüstü bürüyüb. Sakinlər yalnız balkonlara çıxmaqla hava ala biliblər.

Yanğın zamanı daha bir təhlükə yaşanıb. Yanğınsöndürənlər alova bürünmüş elektrik naqillərini su şırnağı ilə söndürməyə çalışıb. Bu zaman köpük əvəzinə sudan istifadə olunub ki, bu da naqillərdə bir neçə dəfə partlayışın baş verməsi ilə nəticələnib.

Qeyd edək ki, binada bütün təmir-tikinti və istismar işləri “AZİMPORT” MMC şirkəti tərəfindən reallaşdırılır. Yanğın söndürüləndən sonra şirkət elektrik lövhələrinin yerini dəyişib. Lakin lövhələr bu dəfə də binanın birinci mərtəbəsində quraşdırılıb.

Xatırladaq ki, bi bina vaxtilə “Mərkəzi Komitənin binası” kimi tanınıb. Orada bir vaxtlar Heydər Əliyev, Kamran Bağırov, Ayaz Mütəllibov, Əbdürrəhman Vəzirov, Ramiz Mehdiyev və sovet partiya-təsərrüfat nomenklaturasının digər məşhur nümayəndələri yaşayıblar.

Onu da qeyd edək ki, bu bina hazırda da Bakının ən prestijli binalarından sayılır. Burada ölkənin tanınmış şəxsləri yaşayır. Onların arasında Prezident Administrasiyasının işçiləri, deputatlar, həmçinin sabiq müdafiə və daxili işlər naziri Tahir Əliyev, sabiq daxili işlər naziri İsgəndər Həmidov və digərləri var.

Həmin bina və onun ətrafındakı digər binalar hazırda hüquq-mühafizə orqanları tərəfindən ciddi nəzarətdə saxlanılır. Bu binaların olduğu məhəlləyə sakinlərdən başqa heç kəs icazəsiz buraxılmır.